શું રાહુલ ગાંધીની ભારત જોડો યાત્રામાં જોડાશે સ્મૃતિ ઈરાની? કોંગ્રેસ તરફથી આમંત્રણ

કોંગ્રેસ નેતા રાહુલ ગાંધીની ભારત જોડો યાત્રામાં ભાગ લેવા માટે કોંગ્રેસના સ્થાનિક નેતાએ અમેઠીના સાંસદ સ્મૃતિ ઈરાનીને પત્ર લખીને આમંત્રણ આપ્યું છે. કોંગ્રેસના નેતા દીપક સિંહે ગુરુવારે અમેઠીના સાંસદ સ્મૃતિ ઈરાનીના સહાયક ખાનગી સચિવ નરેશ શર્માને આમંત્રણ પત્ર સોંપ્યો અને બીજેપી સાંસદને ભારત જોડો યાત્રામાં સામેલ થવા આમંત્રણ આપ્યું.

પૂર્વ વિધાન પરિષદના સભ્ય દીપક સિંહે કહ્યું કે મને પાર્ટીના વરિષ્ઠ નેતાઓ તરફથી સૂચના આપવામાં આવી હતી કે તમને બધાને ભારત જોડો યાત્રામાં આમંત્રિત કરીએ. મેં વિચાર્યું કે સૌથી પહેલા અમેઠીના સાંસદ સ્મૃતિ ઝુબિન ઈરાનીને આમંત્રણ પત્ર આપવો જોઈએ. હું 28 ડિસેમ્બરે તેમની કેમ્પ ઓફિસ ગૌરીગંજ પહોંચ્યો અને નરેશ શર્માને આમંત્રણ પત્ર સોંપ્યો. તેમણે મારો આમંત્રણ પત્ર સ્વીકાર્યો છે અને કહ્યું છે કે હું તેને સાંસદ સુધી પહોંચાડી દઈશ.

‘અમેઠીના સાંસદ કે બીજેપીના કોઈ નેતાના સામેલ થવાનો સવાલ જ નથી’ 

આ મામલે ભારતીય જનતા પાર્ટીના જિલ્લા અધ્યક્ષ દુર્ગેશ ત્રિપાઠીએ કહ્યું કે તેમનું કામ આમંત્રણ આપવાનું છે, પરંતુ આ યાત્રામાં અમેઠીના સાંસદ કે ભાજપના કોઈપણ પદાધિકારીઓ અને કાર્યકરોના સામેલ થવાનો પ્રશ્ન જ ઊભો થતો નથી. તેમણે કહ્યું કે ભાજપ હંમેશા અખંડ ભારતના સંકલ્પ પર કામ કરે છે. જ્યારે ભારત ક્યારેય તૂટ્યું જ નથી, તો પછી તેને જોડવાની વાત ક્યાંથી આવી ગઈ? જે તૂટે છે તેને જોડવામાં આવે છે. રાહુલ ગાંધી દ્વારા ખતમ થઈ રહેલી કોંગ્રેસ પાર્ટીને પુનર્જીવિત કરવા માટે એક યાત્રા કાઢવામાં આવી રહી છે, જેને ભારત જોડો યાત્રા નામ આપવામાં આવ્યું છે.

સ્મૃતિ ઈરાનીએ 2019ની લોકસભા ચૂંટણીમાં કોંગ્રેસના પૂર્વ અધ્યક્ષ રાહુલ ગાંધીને હરાવ્યા હતા. રાહુલ અમેઠીથી ત્રણ વખત સાંસદ રહી ચૂક્યા છે. રાહુલ ગાંધીની યાત્રા 3 જાન્યુઆરીએ ગાઝિયાબાદ થઈને ઉત્તર પ્રદેશમાં પ્રવેશ કરશે.